私人營地分享不經不覺去到EP19， 雖然政府營地已經正式開放，但係今次介紹嘅係Car Camping同埋Glamping集齊於一身嘅新場，不妨留意吓新場GREENOBO綠行鳥，睇吓適唔適合自己。
先講講最重要嘅地點，GREENOBO綠行鳥場地位於元朗大棠， 附近就係最出名睇紅葉嘅地方，所以去露營時順便去行吓都唔錯， 而且場地分開幾部份，分別有露營、車CAMP區、露營車體驗、森林小屋及蒙古包，可以話係照顧晒各類型朋友唔同嘅需要，地方亦都非常大，可以容納好多人。
多個區域適合唔同人所需
當日小編揸車到場就見到一大片草地， 原來營主約小編喺森林小屋嗰邊，等小編可以享受吓冷氣，嗰時先知道原來營地有幾個唔同區域， 成個場約70,000尺，香港營地黎講算係好寬闊。
森林小屋區
森林小屋暫時有四至五間， 開幕嘅時候咁岩係萬聖節，所以放滿公仔，幾有氣氛， 每間小屋內有雙人床一張、露營枱以及露營椅，當然有齊晒冷氣啦，屋與屋之間有相對嘅距離，而且都係望住一片草原及樹林， 住返一兩晚一定相當寫意， 呢啲玩法完全係Glamping，可以享受大自然。
另一特點係營地主人本身都有餐廳， 所以能夠提供外賣訂購到會服務， 而且所有食物非常講究，可以話係打卡必叫，有芝士拼盤以及生蠔任君選擇，但詳細需要訂購時問清楚啦。
汽車露營・露營區
當日小編中午去到，因為係平日暫時仲未有客人喺度， 但係整片草地好大，基本上唔會營貼營，自由度好高，大家鍾意帶幾大個帳篷都容納到， 所以重裝或輕裝及CAR CAMP都適合， 而大棠一向都係睇到星星嘅好地方，夜晚嘅景色應該唔錯。 洗手間企理乾淨而且因為地方大，洗手間有超多格。其他設施包括雪櫃、洗碗地方都企理。
露營車區
露營車區內有兩架露營車，整體感覺有啲懷舊，小編個人會比較喜歡蒙古包或者森林小屋多啲，因為新淨同埋冇咁侷促， 訓喺入邊感覺到用緊新嘅營帳。但如未試過露營車嘅朋友都可以考慮試試。
蒙古包區
最後場內仲有蒙古包可以Glamping， 呢區設施非常新淨，環境好優美，四邊空間亦都非常充足， 而且車可以泊喺隔離，係極罕有嘅做法呀。 同樣Glamping區都可以代訂營主餐廳嘅美食， 係真正輕輕鬆鬆兩手揈揈嘅選擇。
最後小編當日亦品嘗咗呢啲美食， 想推介芝士拼盤真心好食！ 講明先我呢篇報道冇收錢， 如果想支持我哋，可以同我哋傾吓廣告或者訂閱我哋個頻道( 按此）。感激不盡。
https://www.youtube.com/channel/UChek4N_gFq2MDaaNFqJ1vHQ/videos
歡迎大家報料，同我哋分享正嘅營地，或者大家想睇嘅場地介紹！等緊你！
約定大家, 我哋營地相遇!
**以上圖片及資料來源: HKCAMP
**以後關於露營圖片及分享，記得打Hash Tag（#HKHKCAMP）
相關資訊:
Comments