最近發現, 無論係谷內定私底下同營友傾計, 大家都討論緊一個活動UNIO 21a Camping Fest. 大家都非常好奇.
其實UNIO係一個露營活動策劃團體，聯繫擁有不同專長, 但有相同理念嘅朋友及品牌, 大家一齊實行同一理念, 嘗試舉辦不同活動及聯乘項目來推動露營文化, 令露營文化得以延續成為終身興趣.
HKCAMP好高興, 今次可以請到UNIO同我地做訪問, 令一眾谷友可以更加認識UNIO同佢地背後嘅理念.
H: HKCAMP
U: UNIO
每個品牌都有佢地獨特嘅故事, UNIO都唔例外.
H: UNIO嘅角色好似一個平台, 一個召集人, 將相同意念嘅品牌朋友召集係一齊. 可以分享一下你地當初成立嘅故事嗎? 有咩觸發到你地去做呢件甘有意義嘅事?
U: 我地成立UNIO之前, 有一間online camping gear嘅鋪頭. 經營時都發現原來面對好多困難. 我地當中認識到唔同品牌朋友, 發覺原來只有自己個人能力好有限, 只有大家團結一齊, 先有力量去對抗不同困難. 所以我地當時想嘗試去結合不同嘅朋友, 呢個就係我地UNIO嘅起點啦.
雖然大家有著共同理念, 但要聯合大家一齊, 都唔係一件容易嘅事.
H: UNIO當初點樣將合作單位聯繫一齊, 成為Team UNIO呢?
U: 我地有好多年露營經驗, 當中都搞過好多有關露營活動, 所以本身認識好多唔同品牌同店舖嘅朋友, 透過佢地, 我地可以將不同類型嘅朋友連繫係一齊. 係4月我地舉辦左Popup市集, 當中我地都認識到好多新嘅品牌朋友, 整個過程, 從一個朋友再加一個朋友, 大家理念原來都一樣, 我地會視佢哋為partner, 同稱佢哋為Team UNIO.
有左合作伙伴, 成為Team UNIO之後, 一群志同道合嘅朋友就可以一齊聯手推動露營文化.
H: 之前4月時, 你地舉辦UNIO 21 Popup市集好成功呀. 當中過程遇到咩困難可以同大家分享下呢?
U: 整個活動籌備時間好短, 而品牌有好多. 所以唔足夠時間去深入了解每個品牌背後故事. 我地希望可以改善呢方面問題, 作為一個團隊, 我地需要互相深入了解. 所以係黎緊UNIO 21a 三日兩夜露營祭活動, 我地係選擇合作單位之前, 已經遂一同佢地見面傾談. 所以最困難嘅地方, 就係搵到理念相同嘅團隊.
(活動相片: UNIO21 Market)
H: 黎緊十月, 你地會舉辦UNIO 21a 三日兩夜露營祭, 今次露營祭, 會員可以係場內買到限量gear, 又有活動參加, 又有美食, 可以講解下當中構思嗎?
U: 我地參加過唔少外國嘅露營祭, 感覺好正, 好好玩. 其實香港都應該要有甘有特色嘅露營祭. 所以我地就想搞一個.
H: UNIO將來會再舉辦咩類型活動呢?
U: 其實我地無局限未來嘅可能性. 我地可以做好多唔同類型嘅活動. 而好多時, 我地會透過同partner傾談過程中, 發掘唔同可能性. 所以我地都未確定未來會搞咩類型活動, 但目的都係想以推廣露營文化為核心.
(活動相片: 無限音樂營聚)
推動一個文化唔係一件容易嘅事. 但當一群有共同理念嘅朋友走埋一齊, 同心合力就可以慢慢達成. 今日一小步, 成就明日一大步.
H: UNIO希望將來達到咩目標呢?
U: 我地最終當然係希望大家會享受露營時嘅樂趣. 希望讓更多人能夠認識香港嘅MYOG (Make You Own Gear) 品牌設計師. 亦都想將香港嘅好品牌帶去全世界. 香港文化有別於其他國家, 外國人睇到香港嘅用具都會覺得好特別, 我地都好想將呢個想法帶出去.
(活動相片: Botanic Union @ Times Square)
(活動相片: Blue Bottle Pets Park)
H: 香港本土露營文化有別於日本, 台灣, UNIO點睇香港本土露營文化?
U: 香港與其他地區, 好似日本, 台灣, 韓國, 分別在於土地問題. 因為香港可以露營嘅地方好少, 早年香港嘅露營活動都係山上發生, 大家未太深入了解, 都係屬於小眾活動. 但近年多左人認識. 加上疫情, 大家多左留意露營, 同時多左好多新手, 所以出現好多各式各樣嘅意見問題.
我地未來搞活動嘅其中一個宗旨, 就係希望帶出正確露營信息. 比大家知道露營時適合嘅態度同禮儀. 我地相信好嘅信息同理念, 係需要從大家互相影響.
推動露營文化, 大部份都會係喜愛露營嘅朋友. 可以將自己鍾意嘅活動推廣開去, 其實係十分令人興奮嘅事.
H: 你地本身係咪露營發燒友嗎? 有無露營趣事可以同大家分享一下?
U: 我地應該算唔上露營發燒友, 至少未可以頂得住夏天都嘅天氣去露營 （笑）,但都算資深. 要講到露營時遇到嘅趣事, 我地可以分享一個好深刻嘅經驗.
幾年前, 係中環海濱舉辦一個活動, 邀請左不同地方品牌, 好似內地, 日本, 台灣黎香港參與活動. 係中環海濱起左一個營地, 可惜晚上遇到颱風天鴿, 最後要被迫係暴風雨之下拆卸. 呢件事係好難忘. 但其他國家參加者都覺得好開心, 因為佢地都未試過係香港打風, 而且無因為打風問題而影響銷情.
H: 你地喜歡咩露營產品品牌? 有咩推介比露營新手?
U: 我地主要用日本品牌. 我地鍾意睇品牌背後嘅故事. 而日本好多都係由職人雙手去創造品牌, 佢地背後放左好多心血, 只有你用嘅時候先會感受到製造者嘅用心. 當中一個我地喜歡嘅品牌係日本嘅Sabbatical, 係由資深露營者設計, 比較小眾, 但會因應露營時嘅經驗同需要而限量製作產品. 所以我地都好鍾意MYOG, 因為佢地先會知道本土露營嘅需要.
而新手, 我地唔比太多建議. 因為露營其中一個樂趣係從咩都唔識到慢慢投入, 到認識每一件千奇百怪嘅營具背後用途. 整個摸索過程係最有趣, 最興奮. 所以都唔應該比品牌局限自己嘅選擇. 而且露營有唔同style, 好難概括去比一個建議. 所以大家可以睇多少少, 好似唔同地方嘅youtube開箱片, 都好值得大家去睇. 最重要係要知道自己需要咩, 因為人人需要都唔一樣.
經過今次專訪, 相信谷友都會更加認識UNIO. 係找尋相同理念嘅路上都會比較孤獨. 但係搵到志同道合, 理念一樣嘅朋友, 就會覺得值得.
如果大家谷友對UNIO快將舉辦嘅活動UNIO 21a Camping Fest有興趣, 可以到佢地IG (UNIO IG ) 留意下. 多多支持本地品牌, 令本土露營文化可以繼續傳承落去.
約定你, 我地營地相遇~
**相片及資料來源: UNIO
**以後關於露營圖片及分享，記得打Hash Tag（#HKHKCAMP）
Comments