2月28日已讀 2 分鐘

被遺忘嘅遠足露營好物 — 行山杖

要安全咁去到山上扎營地方或者X位，少不免攀山涉水，行少啲山路都未必去得到，但普遍嘅行山初哥都好易忽略行山杖嘅重要性。情願帶支自拍棍，都唔肯拎支好用嘅行山杖，輔助自己、安全咁行山路。今日就同大家分享一下選擇行山杖嘅時候有咩地方需要注意啦！如果有行山高手，或者大家有任何意見，都歡迎留言！

鍾意睇更多露營資訊記得俾個like我哋IG或者Facebook！

好嘅行山杖，可以幫大家控制身體晃動、保持平衡，防止意外摔倒，同時會幫助你征服陡峭路徑，避免行山過程投放大量精力，令登山時更加舒適，選擇適合自己嘅行山杖時，不妨考慮以下幾點：

1）材質

無論係行山或者露營裝備，器材重量都係重要嘅考慮因素，影響成個使用體驗，不同材質製造嘅行山杖，重量都會各有不同，常見材質主要為鋁合金或者碳纖維。鋁合金行山杖非常耐用，唔輕易破裂，適合經常係堅硬嘅岩石上行走。而使用碳纖維製嘅手杖，最主要嘅優點係比鋁輕，就算長時間用都唔怕疲勞，但強度比鋁合金弱，而且價錢較貴。

2）手杖把手

手杖把手普遍以舒適海綿包裹，務求吸汗吸震，增加使用舒適度。其次選擇就係以PP軟膠包裹把手款式，可以加強防水性及耐用程度，但舒適感就較海綿款式略差，未必適合長時間使用。

3）結構

大致分「伸縮型」或「折疊型」。「伸縮式」結構可以透過伸縮杖身來調整長度，但收納尺寸比較長，難以裝入背包，不過優點係可以根據斜坡坡度，適時微調長度。「折疊式」桿身設計，可以將杖身折疊成多部分以便存放，通常比伸縮式更輕身，組裝起來既快捷又方便。但耐用性程度比伸縮式稍差，如果受到硬石猛烈撞擊，更可能會破裂。