HKCAMP 香港人露營分享谷繼9月舉行第一個谷友聚會《CAMPFIRE PARTY 2021中秋營火露營節》之後， 一直構思舉辦多啲唔同類型嘅活動比谷友參加。希望可以同大家見見面，傾下偈。
轉眼間到左露營季節啦，好好彩我哋順利揾到場地，一個舒適又安心嘅營地, 保良局賽馬會大棠渡假村，就係咁11月20-21《開季啦！HKCAMP秋季露營祭典2021》就誕生啦。都多謝大家踴躍參加，小編今次可以見到更多谷友，帶埋一家人，閨蜜，好友一齊黎支持，真係好滾動。
整個秋季露營祭典2021已完滿結束。知道有唔少谷友就唔到時間參加， 咁就睇返花絮先。好！！事不宜遲， 我地馬上睇睇當日活動情況啦~go go go~
首次於露營加入新元素,，令露營有不一樣嘅體驗《野外零Cook Set煮食番外篇》？
兩日一夜嘅露營祭典天氣非常好。 當日谷友入場後，大家都忙住扎營同為營帳裝飾，扎好營帳，活動就正式開始啦，第一個活動就係《野外零Cook Set煮食番外篇》到底係咩嚟？
今次露營祭典其中一個亮點係加入左少量歷奇元素。 我哋好開心請黎香港歷奇嘅一班專業導師, 分享野外無工具之下生火嘅秘訣，小編都有參與其中。《野外零Cook Set煮食番外篇》只用4枝火柴生火， 就地取材燒著火源, 再用紙碟煲滾水同烚蛋， 一啲都唔易！小編同其他谷友都試咗好耐， 最後成功真係好有滿足感。
大家當日都非常投入， 原來好多谷友都係野外高手。大家係活動中互相幫忙， 互相交流心得， 呢個都係HKCAMP想帶出嘅活動目的之一。
隨住音樂慢慢響起，大家都放底煩擾, 露營就係要Chill一Chill
傍晚 Live music音樂會開始啦！Busking音樂慢慢響起，大家都拎齊枱椅，飲品零食黎到台前Chill返下。Live band唱咗一系列比較柔和嘅經典歌曲幫大家熱熱身，講明Busking當然唔少得現場谷友即興表演啦，大家一齊打拍子， 一齊跟住音樂唱， 氣氛真係好正。當然唔少得點唱環節啦，音樂同露營真係分唔開，無音樂又點夠Chill呢？
愛惜營地，HKCAMP想帶出露營垃圾分類文化
露營祭典中其中HKCAMP堅持要帶出的一個訊息，愛惜營地除了可將垃圾帶走，同樣垃圾分類都係好重要，本身小編都參加過不少外地的露營活動，活動中會有一個位置中央收集，同時將垃圾分類，希望慢慢香港更多露營活動可實行將此成為習慣，一齊支待環保。
指定動作? BBQ?
係大家聽緊音樂嘅同時，我哋已經好細心甘幫大家起左火準備BBQ啦。 有谷友同小編分享，覺得今次活動安排滿意, 內容唔會太密集, 可以比大家活動後, BBQ傾下偈, 再認識下其他谷友. 其實每次同大家傾偈, 小編都覺得好開心, 因為聽到大家嘅意見, 先會有改善嘅空間.
之前係谷成日見到谷友分享露營時嘅美食. 原來大家除左BBQ外, 仲帶左好多私伙, 真係睇到小編口水流呀.
絕少光害, 真正可以係夜幕下睇星星, 欣賞月色
營地晚上11點半後就會關哂路燈。 因為遠離市區，所以絕少光害。關燈之後，柒黑一片就只有月光照明。星星就更加明顯啦！谷友都Set埋相機影星星，隨住陣陣涼風吹黎，感覺真係好舒服。有時出走郊外， 就係為左呢一片寧靜。
充滿露水嘅清晨，一個美好嘅早上！
小編係睡夢中，聞到咖啡，聞到麵包香味。 原來谷友都已經醒哂整緊早餐啦。平時係谷見到大家分享美食相， 原來係真架。大家嘅早餐都超級豐富，原來個個都係廚藝高手。大家互相打招呼， 一句早晨，已經好Warm。
露營 X 手作? 點止露營甘簡單
今次活動嘅另一個亮點就係露營當中， 加入DIY工作坊，希望可以讓大家享受慢活節奏， 係露營以外，有另一種新感受。
近期魷魚遊戲紅遍全球，所以活動其中一個工作坊就係糖餅製作。谷友都好期待，當中有個可愛小谷友仲帶埋面具黎玩。小編當然都有參與啦，原來真係好難控制，如果係真嘅魷魚遊戲，唔知大家又過唔過到關呢？
魷魚遊戲糖餅工作坊
扎染工作坊
另一個工作坊係扎染製作。 谷友都好專心聽導師講解， 而導師都好細心解釋每一個步驟需要注意嘅地方，最後大家都完成作品。唔知大家拎到返屋企之後，最後成品又係點樣呢? 歡迎當日參加嘅谷友留言話我哋知呀。
大家嘅支持下，活動完滿結束，12月再見大家！
工作坊完左，大家都準備收拾營帳離開。活動尾聲, 大家一齊影大合照，之後仲同大家交換IG，感覺就好似好朋友一樣，希望下次可以再一齊露營。
開心原於分享快樂，今次活動大家都好投入， 同大家傾偈過程中，可以令HKCAMP更加了解大家嘅需要，之後我地會繼續搜尋唔同營地，舉辦唔同類型露營活動！期待同大家再見面，黎緊就係12月嘅兩日一夜《AMAZING CHRISTMAS CAMP 2021》，報名請按此
再一次多謝大家踴躍參與。 約定大家，我哋營地相遇啦。
**以上圖片及資料來源: HKCAMP香港人露營分享谷
**以後關於露營圖片及分享，記得打Hash Tag（#HKHKCAMP）
Comments