2022年8月29日已讀 2 分鐘

PEEP x VINDAY最熱本地Camping Tee～

HKCAMP一定支持本地品牌，最近火熱嘅本地插畫家PEEP x VINDAY本地品牌一齊設計嘅Camping Tee，呢個組合實在太正，開季必入著去露營～到底呢件Camping Print Tee係點誔生呢，小編搵嚟同樣愛露營嘅VINDAY一齊傾計，了解背後故事。先介紹一吓，VINDAY屬於香港本地品牌，由三位熱愛露營嘅年青人組成，原來背後係一個非常熱血嘅故事，好值得我哋一齊支持。

PEEP & VINDAY合作設計

問: Camping & Chilling Tee今次同插畫家PEEP嘅合作過程係點樣達成？點解會選擇左露營做主題？

V: 今次好榮幸可以同Peep Projects合作，因為我自己本身都好鐘意同留意佢嘅作品，VINDAY本身都有個計劃希望同一啲唔同既單位crossover，有一日心血來潮就想問吓PEEP會唔會有合作，令我哋意想不到嘅係佢好快就答應咗。

之後數次嘅會談都一直討論應該用啲咩作為今次合作嘅主題，而VINDAY幾位店主都鐘意露營，留意到PEEP未嘗試過呢方面嘅作品，所以就提出左露營主題，而PEEP都認為呢個主題幾有趣同想嘗試吓，亦都因為疫情露營成為咗香港人一個熱門活動，我地都希望透過呢個作品，可以帶到一啲共鳴比大家！

熱血故事做就今日嘅VINDAY

問: 每個品牌都有佢哋嘅故事，想了解吓當初係點樣成立VINDAY同有咩理念。 V: 其實VINDAY呢個網店係由賣vintage起家，當初我哋三個店主去日本旅行，其中一晚係河口湖邊把酒當歌，回想自己過往事同有咩成就時，突然就諗到反正人生無咩可以輸，不如試下開一間網店賣衫（我哋幾個都好鐘意襯衫），最多創業失敗就乖乖去打工，之後就去咗下北澤入Vinday第一批貨。直到2021年慢慢由vintage轉型到服裝飾物店，同時引入台灣日本等小眾品牌，就開始左自家品牌「VINDAY」

VINDAY嘅理念談不上偉大，只係希望大眾係香港有更多好嘅服飾選擇，能改變香港 Fast Fashion嘅趨勢，多啲人欣賞本地品牌。 成立本地品牌背後嘅困難

本身三位店主仍然係學生，資金十分有限，一個自家品牌需要定時推出新產品去吸引顧客，生產數量唔多成本會較高，同時店主睇鋪之外都返part-time幫補吓，相信係暫時最大嘅困難。