睇完第一篇台灣露營場地《蟬說: 溪頭生態露營區》，今次到分享記錄台灣車中泊，人生第一次台灣自駕遊真好緊張， 鍾意影片記得俾個like支持吓。
台灣自駕須知
一直比較少聽台灣自駕遊，原因係市內搭的士或者公交已經好方便，冇必要自駕。但如果你已經玩厭市區，自駕的確係一個好選擇，可以睇到更多特別景色，想睇乜跟Google Maps直接去，你會發現原來台灣有好多靚景，係平時唔會知道嘅。
出發前必須準備: 國際駕駛許可證、護照、為咗更加穩陣記得攞埋香港車牌。想知點樣點申請國際車牌，可以直接按此
另一樣要注意就係台灣係左軚，即係同香港相反，就算小編平常會喺香港揸車都要一段時間先適應，仲有需要注意由於台灣電單車好多，因此要將就電單車所以留意路面狀態。 總之萬事小心，慢慢揸相信都唔係難事。
今次非常多謝《VANTEL美學車中泊》租車時已包基本保險，車細細好易揸。由於車來設備齊全，只要搵到停泊地點， 隨時都可以休息， 而佢哋亦都提供唔少嘅車中泊嘅路線，係旅行同埋車中泊嘅好選擇。
第三日．自駕到墾丁
嚟到第三日啦，要喺南投蟬說營地自駕去墾丁，google Maps顯示需要四個鐘頭，好長嘅路途，但為咗靚景小編們認為都值得嘅。
由於去墾丁大部份路段都係高速公路，所以都非常易揸。台灣嘅高速公路會有休息站，俾大家休息去洗手間同埋食嘢，整體都好乾淨同埋舒服，配套亦都係唔差，某些大休息站亦有油站可以入油，長途車都唔算太辛苦。
入到墾丁嘅路段到處都係海，藍天白雲真係好靚！隨便停低都係一個好優美嘅沙灘，我哋仲特登去海邊睇日落，自駕遊的確係一個想停就停，想休息就休息嘅好選擇。
車內設備齊全
講到車內設備！VANTEL真係好齊全， 獨立嘅電池隨時開冷氣及充電， 冷氣亦非常足夠， 喺墾丁嘅時候外面3X度，開住冷氣一啲都唔覺得熱，瞓覺嘅話車內空間感足夠，亦都提供哂枕頭、睡袋等等， 可以話係咩都唔使帶。
如果想野炊， 露營椅同野炊工具都有齊， 細心到連藍牙喇叭同埋咖啡磨豆器都有⋯⋯絕對係一個生活品味嘅空間， 流動式酒店。
車泊地點選擇？
玩得車中泊梗係會喺車上瞓，但同時亦都要顧及水源、洗手間同沖涼設施，選擇地點最簡單就係付費露營區或景點停車場， 因為設施齊備亦都有較高嘅安全性。 記得為自己嘅路線做足功課，車中泊真係一個唔錯嘅旅行方式，鍾意露營嘅你一定要試吓。
*租車時亦都可以問問VANTEL叫佢哋俾意見，佢哋都好樂意回答。
小編都分享一下要注意嘅地方
檢查好設備先出發: 租車時記得檢查各樣設備，雖然出發後遇到任何問題都會有協助，但會影響已計劃好嘅行程，所以記得要check清楚先出發。
避免行小路: 有時GoogleMap會建議你行一啲小路，請盡量避開。因為一般小路較難行，電話訊號亦比較差，如果唔好彩遇到意外就會比較難以求助。
3. 惡劣天氣: 萬一途中遇到惡劣天氣，要暫停車中泊搵安全地方暫避，可選擇立即租住民宿或酒店，再不然就搵附近便利店停泊，以免因為惡劣天氣而被困在車內。
4. 車泊或野炊務必將垃圾處理，做個好嘅遊客人人有責。
最後祝大家旅途愉快，VANTEL美學車中泊喺台灣不同嘅機場都有提供服務，想訂車或對車中泊有任何問題，記得搵佢哋問吓。
Photo & video: Sky@hkcamp
Edit : Ellen@hkcamp
Comentários