記得疫情之前，成日都會聽到朋友分享去咗邊度旅行，每次出嚟食飯，都會收到一大堆來自世界各地嘅手信，食餐飯就好似瞬間看地球一樣，唔知大家有冇同感呢？
小編同大家一樣， 非常掛住外遊，非常掛住係日本揸住車周圍去， 攰就搵個Camp site，租套gear, 想露就露。
日本嘅露營文化已經有好長歷史， 營地都發展得非常成熟。除咗露營之外都會不定期舉辦戶外活動， 音樂會，祭典等等。 活動嘅時候， 大家可以開個營， 一邊享受活動， 一邊享受係大自然露營嘅樂趣，Chill黎講真係世一！
今年5月中，係日本靜岡/富士山兒童之國將舉行戶外音樂節“FUJI & SUN'22”。 到時一定人山人海， 非常熱鬧。 據說日本將慢慢放鬆商旅入境限制， 雖然依家未去到， 希望下次舉行嘅時候，HKCAMP都可以參與，今次就睇住少少資訊， 止止渴先！
“FUJI & SUN'22”將於2022年5月14-15日（星期六，日）係靜岡縣富士市嘅“富士山兒童之國”舉行。到時可以欣賞到富士山壯麗景色， 仲有精選表演者親臨現場表演，仲有不同活動項目比大家參加，係咪好想即刻飛過去？
“Fuji and Sun”已經係第三次舉行，活動賣點當然係富士山。 大家一齊以富士山壯觀景色做背景，搵個最佳位置俯瞰富士山， 同時享受靚景，音樂，活動，工作坊，露營。
活動分為三個階段，除咗會場中心區域嘅“太陽舞台”以及位於岩石區嘅夢幻空間”石頭舞台”之外，仲有樹木環繞區域嘅“月亮舞台”。 大會仲專登邀請各路藝術家，表演者到場， 奧田民男， Fujifabric，奧田民夫、KIRINJI、Dongurizu、Fujifabric、Sadao Watanabe group 都係坐上客， 可以想像到活動有幾盛大同受注目。
專業冒險家阿部正龍，世界著名登山家竹內廣隆都將會參加，到時大家都可以互相交流，學習戶外活動及登山基礎知識，仲有脫口秀表演，以及針對景點嘅日落徒步計劃。
另外，由JOURNAL STANDARD新開嘅戶外專賣店“Yoo Hoo store”，群馬縣桐生市嘅概念店“Purveyors”，以及限定區域“MOON AREA”等都非常值得關注。
“FUJI & SUN'22”戶外音樂節
日期及時間：2022 年 5 月 14 日（星期六） 9:00 OPEN / 10:30 START / 21:00 CLOSE
5月15日（星期日）8:00 OPEN / 9:00 START / 18:00 CLOSE
地點：富士山兒童之國（靜岡縣富士市風崎1015）
真心想即刻就起行！ 希望疫情快快減退， 大家都可以出黎『露』面，更加希望可以到日本戶外露營音樂節同大家營友谷友報道第一手資訊。 等我哋呀！
約定大家， 我哋營地相遇！
*相片及資料來源: FR
**以後關於露營圖片及分享，記得打Hash Tag（#HKHKCAMP）
Commentaires