HKCAMP好開心11月中受到日本邀請到當地露營場地了解！ 相關嘅報道亦都會陸陸續續推出，今次我哋嘅目的地係大阪同和歌山，第一日關西機場落機，日本朋友就推介臨空城Outlet朝聖最新開嘅Sea Side Area內嘅snow peak。
位於關西國際機場坐鐵路只需一個站嘅《臨空城PREMIUM OUTLETS》，最新海邊區域係2020年8月12日正式開幕， HKCAMP小編親身到場拍攝！難得再去日本，一落機就即刻去咗血拼啦，目標就係去最新嘅Sea Side Area，因為個到開咗好大間snow peak，門外就係大阪灣美景，而且仲放咗幾個snow peak帳篷，可以話係鍾意露營人士必到嘅地方。
唔好講咁多，睇片就知有幾正， 嚟緊仲有好多日本露營嘅影片，記得訂閱我哋YouTube啦～
開關後去日本旅行＋露營？
事隔幾年終於可以再去旅行，再嚟日本！HKCAMP嚟日本係有任務在身， 由日本和歌山觀光局帶我哋到日本露營同Glamping，想知和歌山同大阪有咩營地推介？ 記得留意住HKCAMP嘅消息啦～
除咗露營當然唔少得買露營裝備同Shopping啦，大阪臨空城Outlet 有大大小小嘅品牌舖頭，應有盡有， 同時亦都有一定嘅折扣，包保你滿載而歸， 而關於露營嘅舖頭就有Coleman、Logos同最新呢間snow peak。
最新Sea Side Area
小編一去到就直奔Sea Side Area， 由於呢個區域係新開嘅，所以係最入邊近海位置，行入去都需要一啲時間， 所以如果時間唔多嘅朋友建議一去到先入去Sea Side Area。 行到出去就係一望無際嘅海景，側邊就係snow peak啦！
snow peak外邊有戶外地方休息， 最正就係草地有三個snow peak帳篷俾大家參觀同埋打打卡， 不過嗰日去到就落雨，小編影咗幾張相就直接入舖頭啦， 舖頭內地方相當大，同時設有snow peak餐廳，產品亦都應有盡有， 大家黎到就乖乖地攞定信用卡出嚟啦。
小編喺日本嘅第一站、同日本露營旅行文章，將會陸續同大家分享啦， 不過無論你喜唔喜歡露營，呢度都係一個應該要黎到此一遊嘅地方， 話晒嚟日本梗係shopping啦，而且大部份舖頭都適合一家大細，相信大家一定會有收穫， 建議喺旅程嘅最後一日抽時間過嚟， 最後血拼。
臨空PREMIUM OUTLETS 地址： 3-28 Rinkuoraiminami, Izumisano, Osaka 598-8508 營業時間： 10:00–20:00 (*請參考返官方網站作準) 電話： +81 72-458-4600
*亦設有巴士來回機場，大家亦都可以選擇坐鐵路返機場。關於交通方面詳細資料，請睇官網https://www.premiumoutlets.co.jp/m/cht/rinku/
攝影/ 編: Sky
約定大家，我哋在世界各地嘅營地相遇啦！
**以後關於露營圖片及分享，記得打Hash Tag（#HKHKCAMP）
Comments