經常有人分享無人島露營靚相， 攪到大家心思思想試下，今次小編同大家分享三個女仔去無人島露營嘅旅程。
故事開始之前簡單講下佢哋前往無人島嘅方法，三個後生女踐住踏浪艇，孭住個大背囊，仲有幾十公升食水出發，到底可以係點呢？ Let's GO！
無人島沙灘X位夠膽挑戰嗎?
幾日前，香港踏浪艇協會好開心咁同HKCAMP分享，佢哋有三個後生女會員一向鍾意戶外活動同露營，係岩岩過去嘅星期六日就膽粗粗拎住背囊同食水，三個人、 三隻踏浪艇去左無人島沙灘X位。其實去外島露營唔出奇，不過多數都係一大班人。但呢三個女仔，因為係第一次， 所以特別緊張！最後有驚無險咁樣享受咗呢個特別嘅露營經歷。
小貼士 : 佢哋好醒目! 問定場攞電話， 盡量保持聯絡報平安。
踏浪艇係易學易玩嘅水上活動，我哋HKCAMP小編都有玩過，係一個由小朋友至老人家都可以輕易駕馭嘅活動，艇身有大量空位可以比大家放上裝備，即使放滿哂Gear嘅大背囊都夠哂位置。
無人島沙灘.日落氣氛超正!
呢個無人島X位係大埔，出發前佢哋都有做足功課上網查過先敢試，唔好睇三個女仔年紀輕輕，原來三個都係露營高手！當成功登島後真係好興奮，無人島水清沙幼，寧靜而且風景優美，成個島就只有佢哋幾個，真係霸氣包場自己露營， 收好踏浪艇就正式開始Set up， set up完就可以睇住咁靚嘅日落準備美好嘅晚餐啦。 到達沙灘之前仲可以釣返條魚，當晚玩埋野炊燒魚，真係好Raw呀!
係水清沙幼嘅沙灘上扎營， 係日落下野炊， 靜靜地享受屬於佢哋嘅Camping Night!
露得環保.自己垃圾自己帶走
就係咁過咗兩日一夜，第二朝執拾所有嘢就離開啦。
溫馨小提示, 大家不妨每次露營都盡量唸方法沿頭減廢，露營過程好玩，走嘅時候都記得要帶走自己嘅垃圾，等下一個營友都可以享受開心露營樂趣呀。佢哋當然有自己垃圾自己帶走，小編真心比Like!
踏浪艇露營體驗 記得了解清楚先出發
三個女仔嘅踏浪艇露營體驗係咪正呢？其實大家都可以試吓唔同嘅露營玩法！最後溫馨提示大家，如果係露營新手或未試過露營嘅朋友，記得要量力而為同埋要做足資料蒐集先出發， 關於出海亦可以向踏浪艇協會查詢， 佢哋會提供專業嘅意見，咁就開心又放心啦！
約定大家，我哋在世界各地嘅營地相遇啦！
相片及資料來源：香港踏浪艇協會
**以後關於露營圖片及分享，記得打Hash Tag（#HKHKCAMP）
Comments