喜歡露營嘅朋友，到底大家鐘意露營可以有幾盡？
小編從野仔聽到成為野佬嘅音樂組合Yellow都係露營狂熱分子，鐘意露營，甚至為露營作咗首主題曲《有誰露營》！曲風輕快，歌詞抵死過癮，身為營友，去Camping嘅時候想再Camp啲？Playlist一定要有《有誰露營》!
今次小編真係巨級興奮，可以同Yellow 四子做一個「Camp Camp」地嘅訪問，仲可以同佢哋一齊講下露營經。Yellow鐘意啲咩營具? 平時去邊度露？睇吓你就知！
Y: Yellow （主音：小胡 ｜ 鼓手：阿銘｜結他手：Wilson、阿康 ）
H: HKCAMP
歌詞得意、過癮、有共嗚
第一次聽到《有誰露營》，已經覺得歌詞搞鬼又得意，好似第一句「我哋最近成日叫人Camp啲」，到底咩係「Camp啲」？
Y: 其實係口語，就好似平時我哋同人講嘢，叫人「快啲」、「玩啲」一樣。依家叫人去露營可以叫「Camp啲」。
原來Yellow四子除咗阿銘之外，細細個已經係露營狂熱分子，可以講係元祖級營友。
到底「有誰」踢阿銘入坑，令佢從此愛上「露營」？佢哋又點睇依家嘅Camping呢？
銘： 從疫情開始，大家都無得飛，身邊好多朋友叫我去露營。初時我無咩興趣，覺得露營好辛苦，好熱，又無得沖涼。但朋友叫我試下，試完一次之後覺得好好玩，好開心，所以一試愛上咗啦！ 而Wilson同小胡細細個就開始玩露營，係露營老手。
Wilson：依家同以前嘅露營好似兩個世界一樣。細個去露營好刻苦，孭住好重嘅Gear，好唔方便。但依家唔同哂，所有Gear都好方便，設計又好。新嘅露營方式對於都市人黎講係一種享受。但我仍然未好投入新嘅露營世界。
小胡：香港發展出自有嘅露營風格， 世界各地都一樣。以前露營會執石仔、木頭當櫈坐，依家有設計完善嘅伸縮椅，甚至熱石燒裝備，又有清酒，設備完善。但我哋偏向帶少啲裝備， 以輕便為主。
康：中學時期試過露營，但中間已經好多年無玩。印象中以前嘅Gear有啲用鐵造，所以會好重。但依家Gear比以前靚，而且更輕更方便。
銘：依家去露營好多時都會因為套Gear而想去。有時會因為買咗新Gear而好想即刻去。
小胡：係呀，有時拎返套經典Gear或者拎套靚嘢出黎，同行朋友讚賞都會好開心、暗喜。
夏日好熱到營地拍MV
露營仲可以激活大家內心深處嘅童真。就好似MV中，幾個大男孩一齊露營玩水槍，真係咩青春都返哂黎。黎緊凍啲，Yellow仲會繼續出動露兩手，keep住「營/型」！
小胡：一定會呀。等天氣凍啲，可以玩埋全黑營！夠哂型格呀！
銘：一定要凍啲先啦。上次7月拍MV，大家熱到啲汗流到好似比雨淋一樣。
但你帶住副超好型喎！
銘：因為太熱，比汗嗱到對眼紅哂先帶超呀！黎緊中秋過後就係露營開季，到時去就舒服好多啦！
Yellow的露營回憶，香港好靚！
下雨天總掛念從前 「營地」上那可愛片段！ 令野佬非常懷念嘅露營回憶！
小胡：細細個同屋企人一齊去東龍島，同表兄弟一齊訓係沙灘睇星星，仲睇到幾次流星。星河真係好靚。
Wilson：細個童軍上大帽山，夜媽媽見到架車郁郁下（笑）仲有塊布撼住，好鬼異！
歌詞中「去過後發現 原來香港真係好靚」，小編同野佬一樣，因為疫情無得飛，但發掘到香港其他好靚嘅地方！四子心中嘅 X位又係邊？ 話唔定下次可以撞到大家!
小胡：講得X位，當然唔可以透露太多。有時朋友帶我去都唔會講太多。
Wilson：我試過同其他朋友一齊上獅子山某個位，位置唔易搵，但夜景真係好靚。大家可以發掘一下。
但以往好多X位， 依家已經被發現同埋污染。野佬感可惜，喻下次露營應自己垃圾自己帶走，尊重大自然！
露營揀平日比較舒服 露營之所以開心在於互相分享快樂。野佬出動露營，感受香港獨有露營接力文化。
銘：去露營揀岩時間最重要（笑）。試過有次我哋星期日入東龍島，岩岩遇到露營嘅朋友要離開，我哋就接力黎到，大家都會開心share物資，好似高山氣等等。其實係好warm好開心。
小胡：試過有一次星期六入去，啲營多到插針都插唔入，真係要揀岩時間。
有冇試過去露營比人撞到認出嗎？
銘：試過有次去露營，岩岩撞到有單位拍攝，對方都會覺得好驚訝，去到東龍島都撞到我哋。都會有其他朋友撞到，但佢哋都會好好，吾會打擾大家，返到屋企先收到對方信息話見到我。其實大家都會互相尊重，唔會阻住大家Chill!
點解會創作《有誰露營》feat 麗英？
講起Chill，小編第一次聽《有誰露營》感覺就好似執好哂裝備，出發去露營嘅心情一樣，大家坐係營地上，聽到音樂放空。呢首歌真係比到露營Chill Chill地嘅感覺。
其實呢首歌係咪大家露營嘅時候突然間有靈感而創作出嚟？
銘：每一次去露營，大家都會拎個Playlist t出黎播，唸到好似無一隻香港人露營嘅主題曲，所以想做一隻。我哋都好鐘意Chill Pop嘅音樂，呢隻歌係有咗題材再去寫，係露營度身訂造嘅露營之歌。
小胡：有朋友話聽住歌詞可以當checklist，睇吓自己有咩帶漏 （笑）。我哋就係想令大家聽到有去露營時好Chill 嘅感覺，大家感受到我哋想表達嘅野，好開心。
音樂無界線，係大家嘅共同語言。今次野佬同麗英合作，到底發生咗啲咩得意嘢呢？
銘：同麗英合作好似當咗佢係女甘樣（笑）。佢好玩得，調皮同真性情，我哋幾個變哂做Uncle。
小胡：我哋第一次見面就係錄音室，第一次見就要唱歌，所以初時都有啲拘謹。
銘：我哋都夾咗band成廿年，初時都會擔心同麗英會有代溝，溝通唔到。但麗英成日提醒我哋，其實我哋唔老，佢令我唸到其實我哋真係唔係好老（笑）。同麗英合作覺得自己青春咗，就好似同朋友一齊玩甘樣。好開心架。
Yellow又喜歡咩Gear呢？
疫情過後，野佬最想去一次望住富士山嘅露營，每年都會有嘅露營Festival。有音樂，有嘢食，感覺好正。
而講到露營用品，四子各有所好。「爐頭 刀具 水杯用咩peak」其實到底係用咩peak，鐘意露營嘅朋友一定知道。到底佢哋有咩露營品牌特別鍾意， 有咩必買推介？
小胡：我緊係用返我哋Yellow出嘅杯啦！仲有Snowline.
Wilson：露營一定要有韓國隻鑊。煮咩都唔癡底，好好用 (頭先影過)。
銘：爐會用Soto。但我杯唔會用咩Peak啦。試過同朋友去露營，一拎出黎，大家隻隻杯都係咩Peak， 好難認。我會用Evernew，佢日本製， 好輕，最好係佢手柄有顏色可以認到自己隻杯，吾怕拎錯人地！
今次拍攝場地Yama Camping店內除咗大家都認識嘅品牌外， 仲有其他本地原創品牌，露營裝備種類好齊全。店舖老闆仲好有耐性講解唔同營具。小編都忍唔住要買返屋企啦！
野佬同老闆一早成為好朋友，佢哋好多時都會上黎同老闆吹水講下露營野。大家下次上黎，話唔定會見到野佬呀！下次經過記得要上黎睇睇呀，可能會有意外收獲。
今次好多謝野佬同店鋪老闆借出地方比我哋做訪問， 有興趣嘅營友谷友， 下次再買Gear又多個地方選擇啦，老闆同時有露營場地，《有誰露營》MV都係個度拍攝架。
約定大家，我哋營地相遇！
拍攝: Sky@hkcamp
編: Ellen & Miko
**以後關於露營圖片及分享，記得打Hash Tag（#HKHKCAMP）
Comments