農曆新年呢幾日真係超級凍, 日日都只有12,3度, 凍到唔願離開個被窩呀. 但係谷內見到唔少谷友依然繼續keep住團火, 上山露一露, 小編真心要比個Like大家呀!
日間天氣都已經夠哂寒, 上到山上溫差就更加大啦. 夜晚係戶外扎營, 除咗要有個擋風嘅營帳之外, 一個好用又暖笠笠嘅睡袋都非常重要呀!
今日就同大家分享一下, 到底小編平時係點樣選擇露營床墊, 睡袋啦? Go!
了解睡袋形狀 選擇自己嘅喜好 平時小編行露營用品店, 見過最常見嘅睡袋有信封形, 木乃伊(蛹)形及人形. 每個形狀都有支持者, 同時都有好壞之處, 建議大家要試試唔同款式, 再選擇自己鍾意嘅形狀.
小編第一個睡袋就係選擇咗信封形. 顧名思義就係好似一個信封一樣, 四四方方. 所以睡袋內空間感十足, 岩哂反訓嘅營友. 但因為空間寬敞, 唔夠貼身, 所以保暖效果都唔算最理想.
相比起信封形, 木乃伊(蛹)形睡袋保暖感更強. 木乃伊(蛹)形設計睡袋, 可以完整包住整個身體, 所以保暖效果更好. 但就因為太fit身, 所以會有捆住嘅感覺, free style嘅營友可能未必鍾意啦.
係空間感同保暖效果中取得平衡嘅仲有人形睡袋. 呢款睡袋完全以「人」嘅身體形狀設計, 所以用咗佢大家都可以活動自如. 雖然係睡袋, 但可以當大衣穿著, 保暖效果同舒適度係最好, 但同時都係最貴嘅.
睡袋由唔同物料製成, 人造纖維, 羽絨, 棉?! 應該點選擇? 最常見嘅睡袋物料分別有人造纖維, 羽絨及棉. 價錢都因為物料而有分別. 最貴嘅一定係羽絨睡袋. 又輕身, 壓縮性又高, 而且超夠保暖. 羽絨睡袋當中, 以鵝絨最保暖, 所以價錢都會相對貴.
而人造纖維及棉價錢比較大眾化. 不過當然壓縮性同保暖效果都會無咁好. 所謂一分錢, 一分貨. 大家可以因應需要而選擇岩自己嘅睡袋物料.
睡袋可抵禦幾低溫度 你要知道!
相信大家都會留意到, 每款睡袋上都會註明可抵禦最低溫度係幾多. 大致上可以分為冬天及極地環境使用嘅零度以下睡袋. 一般天氣及山上露營使用嘅零至十度睡袋.
一般零至十度都足夠香港私人營地使用. 如果係山上, 晚間可能會低至零下一, 兩度, 建議買個零度以下睡袋會穩陣啲. 小編會帶多幾個暖包暖貼, 甘就夠哂保暖啦!
價錢大眾化 私心推介睡袋款式
相信無營友唔識Decathlon同NH (NatureHike), 呢兩個牌子出名價錢相宜. 大家不妨睇睇, 有無心水嘅睡袋啦.
1. Naturehike U350 信封形全開式戶外保暖睡袋
呢款睡袋唔係用羽絨物料. 但可以抵禦攝氏0-5度. 冬天露營都足夠. 而且全開鏈設計, 攤開可以當棉被睡墊, 腳部位置仲有透氣拉鍊, 可以調節睡袋溫度. 睡袋有可收緊帽帶設計, 方便大家係戶外加強頭頸部保暖. 但要注意, 呢款睡袋比較重, 有成1.7kg, 不過價錢勝在夠哂抵, 大約$300可以買到!
溫度範圍: 攝氏0-5度
極限溫度: 攝氏0度
填充物: 中空棉
尺寸: 220cm x 75cm
重量: 1.70kg
2. Decathlon Triton 木乃伊(蛹)形睡袋Ascent 990 L
呢款腄袋小編都入手咗. 雖然唔係羽絨, 但用咗InsulLOFT 超輕保溫纖維, 所以好似羽絨一樣輕身及高壓縮性. 物料透氣度高, 加上快乾特性, 岩哂香港潮濕天氣時使用. 睡袋雙拉鏈頭設計, 內外打開都超級方便呀! 重點係價錢都唔過$700蚊, 非常抵用.
溫度範圍: 攝氏5-20度
極限溫度: 攝氏3度
填充物: InsulLOFT
尺寸: 210cm x 75cm
重量: 0.93kg
3. Poler The Napsack 雙面人形睡袋
人形睡袋相對黎講比較少見. Poler The Napsack雙面人形睡袋唔單止圖案設計好睇, 而且仲好保暖, 除咗岩哂露營用之外, 滑雪, 衝浪都岩洗. 腄袋肩膀兩邊有拉鏈設計, 手腳都可以伸出黎, 所以靈活性高, 因此價錢都相對貴, 約$1,500不等.
溫度範圍: 攝氏10度內
填充物: 100%聚酯纖維
尺寸: 210cm (190cm身高內可穿)
重量: 1.40g
以上只係私心推介, 其實選擇睡袋都比較個人, 建議大家係購買嘅時候睇多幾款, 做定功課, 咁就唔怕買到唔適合啦. 買齊裝備, 就幾凍都唔怕啦!
約定大家, 我哋營地相遇啦~
相片及資料來源: Naturehike / Decathlon / Poler The Napsack / Google
**以後關於露營圖片及分享，記得打Hash Tag（#HKHKCAMP）
Comments