感激谷友嘅支持，上次露營美食家嘅報道大家反應都好理想。原來谷友營友個個都識飲識食，係廚藝高手。大家都鐘意係露營嘅時候大展身手，特別喜歡煮西餐，日式料理！先講明今次係小編們真心分享嘅絕非廣告。
今次露營美食家續集，我哋決定做露營美食家の食豪啲，小編搜羅唔同種類嘅日式美食店鋪，結集一個露營都可以食豪啲嘅系列，繼續分享，繼續食、玩、露！話哂野炊都係好重要嘅一個環節，今日要講講露營日式燒肉。
相信大部分人都鐘意食日本野，之前都見到好多谷友分享露營時食嘅日式燒肉，涮涮鍋等。最近喺網上發現，原來坊間都有好多包裝好哂，可以方便帶去露營或者野餐時享用嘅日式美食套餐。
今次小編搵到一間位於元朗 (與各大營地都好近，補給方便)，專做日本食品嘅鋪頭。佢哋推出嘅露營套餐真係超正呀，而且價錢唔貴，選擇又多，無論燒肉，涮涮鍋，壽喜燒都啱哂帶去露營，今次真係可以黎一次偽日本美食燒肉之旅啦。
C: HKCAMP
H: H Gourmet Garden
C: 你哋鋪頭推出好多唔同配搭嘅套餐，你覺得啱唔啱我哋帶去露營，野餐或者郊外用呢？
H: 我哋嘅套餐係非常適合帶去露營或者野外用架。套餐嘅食品唔係放係普通日式壽司盒內， 所有食物全部都經過抽真空處理，所以食物都可以保持新鮮。而且抽真空後，都非常適合儲存。唔係人人露營都會重裝，所以抽真空之後，包裝會輕便啲，更加容易帶去露營。
C: 咁過往你哋嘅客人當中，會唔會都有人買去露營呀？
H: 有呀。 好多露營開嘅朋友都會過黎幫襯。大部分都鐘意買和牛，仲會買鵝肝，豬肉片等等，佢哋都好鐘意架。
C: 你哋嘅食品， 大部分都從日本入口。營友買咗套餐之後，可能未必會即時食用。咁你哋會點樣確保食物從日本到營友手中都係新鮮呢？
H: 我哋係直接同日本合作，每星期會返幾次飛機貨，所以貨品流量快，所有和牛都唔會放超過一星期。工場切割急凍程序好快，牛肉唔需要急凍好耐，所以好多客人食過都話絕對能媲美冰鮮和牛，加上省卻咗香港嘅供應商，成本減少咗，所以我哋嘅和牛價錢唔貴，質素性價比好高。送貨嘅時候會用保溫袋，如果較遠地方都會比埋冰包，確保和牛新鮮。
C: 你哋嘅套餐都有唔同配搭，係咪有特別意思架?
H: 其實唔同套餐有唔同嘅食法，好似燒肉，涮涮鍋，壽喜燒等。要睇大家想點食法。例如燒肉同壽喜燒，切法同部位都唔一樣，如果用黎做日式燒肉，會有特定厚度嘅細片，做壽喜燒就用大塊加薄身。套餐會因應客人需求而設。所以有專係燒肉嘅套餐同專係壽喜燒嘅套餐。
我哋都會配搭唔同口感嘅燒肉片及扒，分別有油花重啲嘅， 同時都有牛味重啲嘅做返平衡，咁客人就可以試到唔同口感嘅牛，同時都唔會感覺太油膩。
C: 如果燒肉同壽喜燒，你哋會推介和牛邊個部位最適合呢？
H: 如果燒肉，會比較著重和牛嘅油香。燒嘅時候，溫度同牛嘅油脂產生化學作用，會令油香更出。我會建議揀片裝較易處理，油花最重最滑嘅係三角位，可以食到和牛嘅油香，入口即溶，所以好多客人都鐘意。而我哋嘅套餐仲會配搭大家非常喜愛嘅肉眼扒，牛粒 ，牛舌。
壽喜燒建議用西冷片，油花最均勻，如果想再淋滑啲，可以選擇肉眼片，燒完再配蛋食會更加滑身，口感更加滿足，更加正。
C: 如果營友帶和牛去露營嘅時候，建議用咩方法烹調最適合呢？
H: 如果燒肉，其實好簡單燒香完配少少鹽吊味就已經好正。營友帶去露營，仲可以加埋生菜，中和油膩感。壽喜燒係香港最近比較流行， 配有特別嘅壽喜燒汁，燒香再淋上汁，加上蛋食會更加滑。而且好易做，唔識煮野食嘅朋友都可以煮到。
C: 其實坊間有好多種類嘅和牛，不如建議下營友點選擇。
H: 其實都好睇營友個人口味。 如果鐘意油香，可以選擇油脂分布多嘅和牛，好似三角位，西冷，肉眼，肩位都好重油香。
如果怕油膩，鐘意牛味重嘅，可以選擇赤身，赤身係牛腿位置， 但肉質唔會韌，牛味會再重再濃啲， 都好啱用黎做涮涮鍋。仲有外邊比較少有嘅胸腹部位，腹柳小排部位，油花同肉較平均， 我哋都有入，都好多客人會選擇。
C: 依家外帶食物都成為新趨勢，你哋將來會唔會再推出其他套餐呢？
H: 會呀。 依家身邊都有好多去露營嘅朋友。我哋將會推出更多套餐，更多組合，希望比大家多啲選擇，多啲配搭。同時我哋都會親身試過先入貨，自己鐘意先會入返黎推介比客人。而且我哋送貨點都會陸續增加，更加可以配合到大家送貨嘅時間。
唔講唔知，店主仲教咗大家選擇和牛嘅小tips。
和牛產地及品種係非常重要，和牛分紅種，黃種，純種黑毛，純種黑毛係最高級別，而最好食嘅係鹿兒島黑毛和牛。所以店主嘅店舖只選擇日本全國公認No.1嘅鹿兒島純種黑毛和牛。
另外，解凍和牛嘅方式都好重要。由於露營嘅朋友通常都需要即日室溫下解凍牛肉， tips係牛肉解凍時可剪開袋口， 比返啲空氣比牛肉，防止真空情況下解凍會使缺氧變深色，雖然解凍之後變深色唔影響食用，但影唔到靚相啦。
另外建議營友食用前視乎天氣，預1-1.5小時前拎出黎解凍最合適。
認住個門口啦，今次真係好開心可以同店主傾下偈，仲長知識添呀。 大家下次去露營，又多一個好選擇啦。
平時生活忙碌， 出黎露兩手嘅時候不妨對自己好啲，繼續露營食豪啲啦！
如果想了解更加，歡迎瀏覽以下連結：
H Gourmet Garden
Web site: https://bit.ly/3JSDvYg
如果谷友有咩好味嘅露營菜式或者店鋪想分享，歡迎大家報料，開心Share~
約定大家, 我哋營地相遇!
**以上圖片及資料來源: HKCAMP香港人露營分享谷 / H Gourmet Garden
**以後關於露營圖片及分享，記得打Hash Tag（#HKHKCAMP）
Comments