2022年3月1日已讀 3 分鐘

露營美食家の食豪啲系列《和食料理篇Part2》

上次分享完日式燒肉，今次就講講最近比較流行嘅壽喜燒啦。雖然依家少咗露營機會，但下次露營嘅時候，都可以多個選擇啦! 今次都係小編們真心分享，絕非廣告呀！

唔知有冇一隻味道係一食到就會諗起日本嘅呢？去日本成日食到料理個種甜甜地嘅味道，小編每次係香港食到都會諗起日本。呢種甜甜地嘅味就係類似壽喜燒啦！相信唔會有人唔鐘意嘅口味。

今次HKCAMP好開心請黎網上專做壽喜燒盛盒預訂服務嘅店舖，大家無論係屋企，定係帶去露營食，都非常正。下次想試試新野都可以多個選擇啦!

H: HKCAMP

S: Sukiyaki Master

H: 你哋店做好多好靚好精緻嘅壽喜燒盛盒，你覺得呢類型盛盒套裝可以帶去郊外，露營，野餐食用嗎？

S: 呢兩年多咗人鐘意露營，而呢一兩年間，都多咗朋友訂壽喜燒set去露營食用。加上我哋嘅包裝都好啱帶去郊外，露營煮食用，所以都好適合。

H: 咁多客人買你哋嘅set，當中佢哋會唔會買去露營呀？

S: 會呀，唔少客人都會訂去營地，都有客人訂去車中泊食用。

H: 你哋嘅壽喜燒主打係日本入口嘅和牛，你哋係包裝方面點樣確保食物可以保持新鮮，令營友可以食到新鮮美味嘅和牛呢?

S: 我哋有自己嘅車隊，而車隊係雪車，所以從出貨一刻，食物已經放係雪車嘅凍櫃內，溫度會保持係0-4度。加上我哋會提供保溫袋及冰種，保溫情度會大大增升。送到營地之後，包裝仍然可以保持保溫，食物再隔1-2小時食用都仲好新鮮。

H: 你哋嘅壽喜燒盛盒有分唔同配搭及價錢，係咪都有細心設計過呢？

S: 其實我哋嘅set都有好多唔同款式，配搭嘅蔬菜盒係一樣嘅，主要唔同係和牛嘅部位。有啲set有唔同部位，有啲就係全和牛，有啲會配搭豚肉及海鮮，可以配合大家需要而選擇。

H: 如果營友未試過壽喜燒，你哋會先推介營友食邊個部位先呢？

S: 用黎做壽喜燒最熱門嘅部位係西冷，肉眼。如果係日本當地食，腿肉都會係最多人會食嘅。我哋set入邊都有西冷，肉眼，都係好熱門。

H: 你哋嘅set入邊都有好多配料呀，如果營友帶去露營，應該要點烹調最好味呢？建議用咩方法烹調最適合同埋食到和牛嘅鮮味呢？

S: 我哋建議營友用一個關西風嘅壽喜燒煮法，先用附送嘅牛脂起鑊，煎香大蔥再落和牛，煎香和牛再倒入我哋秘製嘅壽喜燒汁，就可以食啦。試咗幾片和牛之後，可以倒入多啲壽喜燒汁，加入蔬菜盤內配料，因為我哋嘅壽喜燒汁已經調配好口味，加上蔬菜烹調中會有多餘水份，所以唔建議大家加水，味道會啱啱好。蔬菜吸收咗牛同汁嘅精華會更加好味。