近年露營成為大家都鍾意嘅活動, 除咗可以約埋家人朋友一齊Chill一Chill外, 最近都見到好多朋友帶埋小毛孩一齊去露營. 狗狗可以好開心咁係草地上盡情放電.
陳經理 & 湯丸
呢兩個Friend過打Band嘅狗狗就係陳經理 (陳仔)同埋佢嘅緋聞女友湯丸! 佢地都係哥基呀.
原來當日係湯丸嘅生日Party, 所以主人仲整咗好精緻嘅狗狗大餐比佢哋兩個慢慢嘆呀!
黎到草地, 當然要打下卡啦. 其實狗狗同人一樣, 係一大片草地上邊都會特別開心, 跑跑跳跳, 好快又過咗一日啦.
帶住小毛孩去營地都會擔心佢哋唔習慣, 所以佢哋平時都係Day camp為主, 等佢地去多幾次, 習慣咗露營環境就可以挑戰過夜啦!
Goma
當日小編仲認識到柴柴Goma. Goma係日文芝麻嘅意思. 佢係一隻非常乖巧定檔嘅狗狗, 主人靜靜雞同小編講原來Goma好鍾意食野, 佢會用食物鼓勵Goma. 慢慢就變成一隻乖巧嘅狗狗啦.
主人今日仲帶埋Goma專屬露營床仔, 比佢係草地上Chill返下. 而且佢已經習慣露營, 會陪主人玩足兩日一夜先返屋企呀.
其實小毛孩就好似一個人仔, 都會有自己性格脾氣. 多啲帶佢哋出黎玩下跑下, 主人同狗狗都會好Relax, 好開心呀. 如果大家未試過帶狗狗去露營又好想試試嘅話, 可以先去Day camp, 等佢哋習慣咗係郊外同露營嘅環境之後, 就可以試試過夜啦.
HKCAMP之前探訪過唔同場地, 當中都有唔少場地係狗狗友善, 歡迎狗狗入場露營. 好似UncleB, 喜喜草園, 白泥, 四季農莊, 雙魚小丘. 如果大家想知道邊一個場可以帶埋狗狗入場玩嘅話, 可以睇睇"一文睇哂，香港私人營地總覽"
另一個小提示係, 狗狗對其他狗狗朋友有時會好熱情或者會好緊張, 或者營地附近都會有居民養狗, 建議入營前可以先問問場地附近會唔會有其他狗狗, 如果附近居民有養狗, 或者場地內有其他狗狗嘅話, 主人們記得看管好狗狗, 以免佢地會打架受傷呀. 而且仲要記得帶多少少狗狗嘅食糧同埋飲用水, 唔好唔記得佢哋都要開餐呀.
注意好細節, 看管好小毛孩, 甘就大家都玩得開心又夠Chill啦.
小編都有養狗狗, 希望下次去露營嘅時候, 可以帶埋Miso仔仔一齊同大家玩下啦.
約定大家，我哋在世界各地嘅營地相遇啦！
編: EE
攝: Sky
設計: Sky
相片及資料來源：HKCAMP
**以後關於露營圖片及分享，記得打Hash Tag（#HKHKCAMP）
Comments