太滾動啦！太滾動啦！HKCAMP今年盛夏，首個露營+水上活動腳踏獨木舟《HKCAMP夏水禮露營祭2022》係6月17-19日，一連三日完滿結束啦！
今次活動係第一次一連三日進行，真係好多謝參加嘅谷友朋友，場地赤柱戶外訓練營及教練們，有大家支持，活動可以順利舉行。今次活動除咗認識到好多新朋友之外，仲見返上次參加HKCAMP聖誕節活動嘅谷友添呀，真係好開心！
大家嘅踴躍支持就係我哋嘅力量泉源，今次參加唔到嘅朋友就睇住Playback 先啦，下次再約定大家一齊玩！
風和日麗・出海好時候?
入營前幾日天氣都唔太穩定，HKCAMP及教練們都非常緊張，萬一真係傾盤大雨，大家仲點出海玩？最後好好彩無落雨，天氣穩定，當然要出海玩返夠本啦！參加朋友一個一個入營，換好衫之後，就集合準備開始夏水禮啦！GoGoGo!
水上活動事前準備要充足・專業教練講解要跟足
今次活動嘅主角就係出海齊玩腳踏獨木舟啦！開始之前， 當然要著好浮水衣。再聽聽教練講解點樣利用腳踏獨木舟配置嘅𣛟前行啦。 大家都好專心呀！
原來腳踏獨木舟嘅𣛟同一般獨木舟嘅𣛟係有分別㗎，小編都係聽教練講完先知道！而腳踏獨木舟嘅精髓當然係對腳踏啦。 聽完教練講解之後，參加者攞埋腳踏就準備出海啦！
全程教練陪同・玩得開心又安心
玩水上活動，安全最重要。因為想確保每個參加朋友都得到專業教練嘅看顧，所以今次活動嘅人數，我哋都做好控制。有谷友PM問小編點解活動甘快額滿，都係因為呢個原因呀， 參加唔到嘅谷友，真係要同大家講聲唔好意思啦！
係教練幫忙之下，大家一隊一隊跟住落水。 教練一行三人，前面先落水睇住已經落咗水嘅朋友，等其他參加朋友都落埋，兩位教練就會尾隨包抄，咁樣就可以確保出海嘅朋友都可以看顧到，大家見到教練都會安心好多啦！
我哋小編都跟埋大家一齊玩，感受一下腳踏獨木舟有幾Chill先！
碧海暢遊・感受迎面海風・真心爽
水上活動時間選擇咗係下午三點多開始，太陽伯伯呢個時候訓緊晏教，所以無甘曬又舒服啲。雖然冇咁曬，大家玩水上活動都一定要做足防曬呀！
小編同大家一直踏到赤柱美利樓， 望返岸邊， 景色超靚。而且陣陣海風， Chill級爽。
水上活動後 開始起營煮食
今次活動令一個亮點當然係露營啦！大家上水後， 梳洗完就開始起營煮野食啦。 活動當日， 踏入炎夏天氣都開始熱， 但好在園區有冷氣大堂，參加朋友都表示正!
小編當日同參加朋友一齊享受美食，對住海景煮野食，真係好治愈，多謝大家請小編食嘢啊，真係好窩心。露營帶比小編最深體會就係可以認識大家，同大家互相交流， 呢個都係露營嘅意義，不過掛住食嘢冇乜影相。
海景露營・感受大自然海風
營地其中一個亮點就係海景露營， 大家都急不及待Setup雖然有啲熱，但大家帶咗風扇，加上晚上帶點微風，大家一齊係梯田草地上露營，仲會聽到海浪聲，真係好治愈呀。
全海景早晨・即影即有小互動・為活動作結
小編每次露營，最鐘意係清晨起身煮早餐嘅時候，唔知谷友有無同感呢？咖啡夾雜煎蛋嘅香味，加埋草地嘅草青味，仲有同營友講聲早晨，感覺真好！
加埋呢個無敵靚海景，當然要同大家影返張「即影即有」相片留念啦，參加嘅朋友超有心思，係相片上寫字留言，希望大家會喜歡呢個安排啦！
HKCAMP希望之後可以再帶多啲活動比大家，再次一齊流汗， 一齊玩，一齊享受美食同露營嘅樂趣。我哋好快再見！
約定大家，我哋營地相遇！
**以上圖片及資料來源: HKCAMP香港人露營分享谷
**以後關於露營圖片及分享，記得打Hash Tag（#HKHKCAMP）
相關資訊:
Comments